Bertako basoak berreskuratzeko zuhaitz landaketa (1. fasea)

Gaur ekimen berezi batean parte hartzeko aukera izan dut: Itsasoko natur ondarearen kontserbaziorako zuhaitz landaketa.

Jarduerari hasiera emateko, San Lorentzo ermitarantz abiatu gara, han baitaude Itsasoko Udalak baso autoktonoa berreskuratu eta mantentzeko erosi zituen 10.5 hektareak. Proiektua gauzatzeko Aranzadi Zientzia Elkartearen lana eta udalerriko boluntarioen laguntza izan dira.

Landaketa-eremura hurbiltzen ginen bitartean, Mikel Etxeberriak (habitaten kartografia eta flora mehatxatuaren kontserbazio, jarraipen zein kultiboan espezializatutako biologoa) basoak zaintzearen garrantziaz eta gure inguruneko berezitasunez hitz egin digu.

Zergatik kontserbatu edota leheneratu behar dira basoak?

Mikelek kontatu digun moduan, basoa zuhaitzez estalitako eremua da, tokian tokiko espeziez osatutakoa, egur hila eta hainbat adinetako zuhaitzak dituena. Hauen garrantzia ezinbestekoa da krisi klimatikoari aurre egiteko eta osatzen duten ezinbesteko funtzioa bost arrazoietan laburbildu daiteke:

1. Biodibertsitatearen gordailu dira.
2. Lurzorua eta ura babesteko ezinbesteko ditugu. 
3. Karbonoa xurgatu eta klima erregulatzen dute.
4. Hainbat produktu eskaintzen dizkigute: egurra, produktu jangarriak, aziendarentzako bazka, osasungintzarako osagaiak, kosmetikoak egiteko lehengaiak, lanabesetarako edota eskulangintzarako hainbat material…
5. Balio espirituala eta aisia balio handia ere badute.

Zoritxarrez, baso autoktonoak eta, ondorioz, biodibertsitatea, gutxiagotzen ari da. Aipatu digunez, baso naturalen presio garrantzitsuenak habitat suntsiketa eta lur erabileraren aldaketa dira.

Itsaso inguruan egindako landaketak

San Lorentzo 600-700 metrotik behera dagoenez, hariztiak behar luke bertan nagusi.

Hariztiek klima baldintza heze eta leunak behar dituzte, hotz handirik gabeak; ondorioz, haranak eta eguterako magalak dituzte gogoko. Hariztiak ez dira bereziki ilunak izaten; ondorioz, oihanpe oparoa izaten dute.

Baldintza horiek kontuan hartuta, espezie autoktonoetako 2.700 zuhaitz landatu dira:

Landaketak taldeka egin dira, baso heterogeneagoa lortzeko asmoz. Hariztiek Gipuzkoako basorik anitzenak eratzen dituzte eta laster gune hau ere gure inguruko biodibertsitatearen lekuko izatea espero dugu.