Moda eta diseinu jasangarria
Miszelania produktu eder eta arduratsuez betetako denda da. Txoko honen jabea den Ainitzek produktu bakoitza mimoz aukeratzen du, jasangarritasuna ardatz, detaile guztiak zainduz.
Bertara gerturatzen diren bezeroek, arropa eta etxerako produktuak erostetik haratago, gauza bereziak aurkitu eta hauen atzean dauden pertsona, istorio eta balioa ezagutzeari ematen die garrantzia. Sortzaile bakoitzaren lan-baldintza duinak, ingurumenarekiko errespetua eta sentsibilitate estetikoa biltzen dituzten piezak, alegia.
Marka unibertsoaren osaketa:
Proiektuaren erronka, bezeroek dendan izaten duten esperientzia hurbil, hezitzaile eta inspiratzailearen sentsazioa helarazten duen ikus nortasuna eta online espazioa sortzea izan da.
Prozesua hasi genuenean, Miszelaniaren nortasuna ondo transmititzen zuen logotipo bat zuen, Ainitzeren idazkeratik eratorria. Baina marka unibertsoa osatzen duten beste elementuak falta zituen: kolore paleta, tipografia konbinaketa, marka aldaerak, ilustrazioak, argazkiak…
Beraz, logotipoa abiapuntu bezala mantendu eta ikus-nortasuna osatzeri ekin genion. Horretarako, marka pertsonalitatea eta bezeroen profila definituz hasi genuen prozesua, sustraietara joz.
Alde batetik, kolore paleta atsegin, goxo eta anitzaren alde egin genuen, Ainitzek bezero bakoitzari eskaintzen dion gertuko hartu-emanaren adierazle. Sektoreko joera neutro eta minimalistetatik aldendu eta ukitu koloretsuagoaren bidez bereizi genuen proiektua.
Aldi berean, serifadun tipografia fin eta dotorea aukeratu genuen izenburuetarako, produktuen kalitate handiari eta xehetasunen zaintzari erreferentzia eginez.
Bestalde, hainbat testuingurutara egokitzen diren logotipoaren bertsioak eraiki nituen, markari malgutasuna eskainiz.
Dendaren esentzia online mundura:
Markaren oinarriak ondo definituta, online dendaren diseinuari ekin genion.
Webgunearen bidez moda eta etxerako artikuluak eskaintzetik harago, Concept Store honek irizpide etiko eta estetikoak uztartzen dituela erakutsi nahi genuen.
Horrez gain, erosketa esperientzia atsegina eta intuitiboa izan zedin, informazioaren antolaketa eta nabigazio erraza izatea zaindu genituen. Etapa honetan Garbiñe argazkilariaren (Meet me in the North) lan ederrarekin bat egin genuen dendako esentzia jasotzeko.
Zure markak ere ingurunea eta pertsonak errespetatuz bezero egokiak erakartzea gustatuko litzaizuke?
Has gaitezen lanean
