Duela urtebete eman zitzaion hasiera Itsasoko ondare naturala berreskuratu eta zaintzeko proiektuari.
Udalak gure ingurunea kontserbatzeko hiru ekintza jarri zituen abian: Alegiako Santa Luzia ibaiaren ertzean dagoen haltzadia leheneratzea, Kizkitzako pagadia mantentzeko lanak burutzea eta San Lorentzo aldeko baso autoktonoak berreskuratzeko landaketak egitea.
Zuhaitz autoktonoen landaketen bigarren fasea
San Lorenzoko basoa berreskuratzeari buruzko argitalpenean aipatu bezala, lehenengo fasean 2.700 zuhaitz landatu ziren Aranzadiren lanari esker, eta herriko boluntarioek egun batez erronka honetan laguntzeko aukera izan genuen.
Urte batez basoaren bilakaera ikusi ondoren, gaur espezie autoktonoetako 60 zuhaitz landatuz eman diogu jarraipena proiektuari: haritzak, gereziondoak, elorriak, gaztainondoak, astigarrak…
Lanean hasi aurretik, Aranzadi Zientzia Elkarteko biologoa den Mikel Etxeberriak kontatu digu Gipuzkoako pertsona batek urtean sortzen dituen batez besteko emisioak konpentsatzeko zuhaitz batek 100 urtez hazi eta oxigenoa sortu behar duela. Ene bada!
Datu horrek oraindik indar handiagoa eman dizkigu ekintzara pasatzeko.
Zoragarria da Itsasoko herrilurrak bertako zuhaitzez nola janzten ari garen ikustea. Nahi baduzu, gaurko landaketaren bideo labur bat ikus dezakezu hemen.
Horrelako egunek ekintza txiki bakoitzak mundu atsegin, berde eta biziagoa sortzeko balio handia dutela gogorarazten didate.
Utzi erantzun bat