Liburu bat oparitzea zoragarria iruditu izan zait beti. Eta, gainera, gure ingurunea gehiago errespetatzeko ohiturak hartzera animatzen bagaitu… ezin hobe, ezta?
Bizi-ohitura jasangarriagoak hartzen hasi bazara, diseinatzaile izanda prozesu etikoagoa ezarri nahi baduzu, enpresa txiki bat baduzu eta zure produktuaren bilgarria zure balioekin lerrokatu nahi baduzu, umeak badituzu eta txikitatik lurra eta bizitza maitatzea nahi baduzu… liburu bat dago zuretzat.
Diseinu grafiko kontzienteago baterako hiru proposamen:
Cradle to cradle
Michael Braungart eta William McDonough
Diseinu iraunkorraren oinarriak finkatu nahi badituzu, liburu hau ezinbesteko bat da. Bi protagonisten ibilbidetik, planetari eta bertan bizi direnei eragin positiboa emango dien diseinu-prozesua eraikitzeko oinarriak ematen ditu.
Nik esaldiez, oharrez eta markatzailez beteta dut liburua. Hemendik hastea erabakitzen baduzu, arkatz bat eskura izatea gomendatzen dizut ; )
Green packaging solutions
Miquel Albellán
Bilgarri ekologikoak dituzten proiektuen bilduma bat da. Zure hurrengo packaging-ak ingurumena errespetatzeko inspirazioa nahi baduzu, 79 adibide aurkituko dituzu hemen.
Nahiz eta ideia-iturri ona izan, zenbait proiekturen deskribapenean materialen eraginari eta haiek hautatzearen zergatiari buruz gehiago sakontzea ondo legoke.
Eco packaging now
Tony Ibbotson y Peng Chong
Inspirazio-liburuekin jarraituz, argitalpen honek ere eko-ontzien proiektuak biltzen ditu, hiru kategoriatan antolatuz: birziklagarriak, berrerabilgarriak eta biodegradagarriak.
Askotariko erreferentziak aurki daitezke, baina, kasu honetan ere, uste dut gehiago garatu ditzaketela azalpenak, jasangarritasunaren irizpideen arabera. Proiektu batzuk bi liburuetan errepikatzen dira.
Bizimodu kontzienteago baterako hiru proposamen:
Revista Pantera
Savvana Books
Adin guztietara zuzendutako naturari buruzko aldizkaria da. Pertsonak inspiratu nahi ditu planeta maitatu eta zain dezaten.
Artikuluak eta istorioak erraz irakurtzen dira eta datu interesgarriz beteta daude. Oraindik ere haaaainbeste dugu lurretik ikasteko… Gainera, irudi ederrak ditu. Familia osoaren kontzientzia pizteko egokia.
Cambia el mundo
María Negro
Bizitza kontzienteagoa egin nahi baduzu, baina nondik hasi ez badakizu, egileak 10 urrats proposatzen dizkizu iraunkortasunerantz abiatzeko. Erraz irakurtzeko moduko liburua da, eta eguneroko bizitzan aplika ditzakezun aholkuak eta ariketak ditu.
Hasiera ona da keinu txikiek duten eraginaz kontzientzia hartzeko eta ondoren beste irakurketa batzuekin sakontzeko.
Semillas
Cristina Camarena eta Vanesa Freixa
Monografiko hau crowfounding fasean bultzatuz eskuratu nuen. Kultura birsortzaileari eta bizitza jasangarriari buruzko testuek lasaitasunez eta kontzientziaz irakurtzeko gonbita egiten dute. Liburu sakona da, eta paradigma aldatzea proposatzen du, bizitza erdigunean jarriz.
Gainera, maketazioa oso zaindua du; argazki, ilustrazio eta testu-konposizio bakoitza istorio bakoitza modu ederrean indartzeko pentsatuta dago.
Gehiago ikusteko gogoz gelditu zara?
Liburuak gustatu bazaizkizu eta zure helbide elektronikoan proposamen gehiago jaso nahi badituzu, eman izena nire newsletterrean.
Leave a Reply